പ്രതിസന്ധി ഘട്ടങ്ങളെത്തുടർന്ന് റിലീസ് നീട്ടുന്നതായി നിർമ്മാതാവ് ആന്റോ ജോസഫ് കഴിഞ്ഞ ദിവസം അറിയിച്ചിരുന്നു
കൊച്ചി: മലയാള സിനിമയിലെ ഇതിഹാസ താരങ്ങളായ മമ്മൂട്ടിയും മോഹൻലാലും ഒന്നിക്കുന്ന ബിഗ് ബജറ്റ് ചിത്രം ‘പേട്രിയറ്റ്’ മെയ് ഒന്നിന് തിയറ്ററുകളിലെത്തും. നേരത്തെ ഏപ്രിൽ 23-ന് നിശ്ചയിച്ചിരുന്ന റിലീസ് ആണ് നിലവിലെ പ്രത്യേക സാഹചര്യങ്ങൾ പരിഗണിച്ച് മാറ്റിവെച്ചത്.
പ്രതിസന്ധി ഘട്ടങ്ങളെത്തുടർന്ന് റിലീസ് നീട്ടുന്നതായി നിർമ്മാതാവ് ആന്റോ ജോസഫ് കഴിഞ്ഞ ദിവസം അറിയിച്ചിരുന്നു. ഇതിന് പിന്നാലെയാണ് താരങ്ങൾ തന്നെ പുതിയ റിലീസ് തീയതി ആരാധകർക്കായി പങ്കുവെച്ചത്.
പ്രശസ്ത സംവിധായകൻ മഹേഷ് നാരായണനാണ് ഈ ചിത്രം ഒരുക്കുന്നത്. ഏപ്രിൽ 23-ന് റിലീസ് ചെയ്യാനിരുന്ന ചിത്രം, അപ്രതീക്ഷിതമായി ഉണ്ടായ സാഹചര്യങ്ങളുടെ സമ്മർദ്ദം മൂലമാണ് മെയ് ഒന്നിലേക്ക് മാറ്റിയതെന്ന് നിർമ്മാതാവ് വ്യക്തമാക്കി.
മമ്മൂട്ടിക്കും മോഹൻലാലിനും പുറമെ ഫഹദ് ഫാസിൽ, കുഞ്ചാക്കോ ബോബൻ, നയൻതാര, രേവതി, ഗ്രേസ് ആന്റണി തുടങ്ങിയ വമ്പൻ താരനിരയാണ് ചിത്രത്തിൽ അണിനിരക്കുന്നത്. മമ്മൂട്ടിയും മോഹൻലാലും തങ്ങളുടെ ഫേസ്ബുക്ക്, ഇൻസ്റ്റാഗ്രാം അക്കൗണ്ടുകൾ വഴിയാണ് പുതിയ പോസ്റ്റർ പങ്കുവെച്ച് റിലീസ് തീയതി സ്ഥിരീകരിച്ചത്. വർഷങ്ങൾക്ക് ശേഷം മലയാളത്തിലെ സൂപ്പർ താരങ്ങൾ ഒന്നിക്കുന്ന ചിത്രമായതിനാൽ തന്നെ വലിയ ആവേശത്തിലാണ് സിനിമാ ലോകം.
