ലണ്ടന്: ഗാന്ധിജയന്തി ആഘോഷങ്ങള് അടുത്തിരിക്കേ, ലണ്ടനിലെ ടാവിസ്റ്റോക്ക് സ്ക്വയറില് സ്ഥാപിച്ചിട്ടുള്ള മഹാത്മാഗാന്ധിയുടെ വെങ്കല പ്രതിമ ഇന്ത്യാവിരുദ്ധ വാക്കുകള് എഴുതിയും പെയിന്റടിച്ചും വികൃതമാക്കി. സംഭവത്തെ ഇന്ത്യന് ഹൈക്കമ്മിഷന് അപലപിച്ചു. ലജ്ജാകരമായ പ്രവൃത്തിയും അഹിംസയുടെ പാരമ്പര്യത്തിനു നേരെയുള്ള ആക്രമണവുമാണെന്ന് ഹൈക്കമ്മിഷന് പ്രതികരിച്ചു.
പ്രതിമ വികൃതമാക്കിയ സംഭവം ഹൈക്കമ്മിഷന് ബ്രിട്ടീഷ് അധികാരികളെ അറിയിച്ചു. പ്രതിമ പഴയരീതിയിലാക്കാന് നടപടികള് സ്വീകരിച്ചതായും ഹൈക്കമ്മിഷന് അറിയിച്ചു. അന്വേഷണം ആരംഭിച്ചതായി പൊലീസ് പറഞ്ഞു. എല്ലാ വര്ഷവും ഗാന്ധിജയന്തി ദിനത്തില് പ്രതിമയില് പുഷ്പാര്ച്ചന നടത്താറുണ്ട്. 1968 ലാണ് ടാവിസ്റ്റോക്ക് സ്ക്വയറില് പ്രതിമ അനാച്ഛാദനം ചെയ്തത്. ലണ്ടനില് നിയമ വിദ്യാര്ഥിയായിരുന്ന മഹാത്മാഗാന്ധിയോടുള്ള ആദരസൂചകമായാണ് പ്രതിമ സ്ഥാപിച്ചത്.
