ന്യൂഡല്ഹി: വിമാനനിരക്കില് പരിധി നിശ്ചയിച്ച കേന്ദ്രസര്ക്കാര് ഉത്തരവിനു ശേഷവും ഉയര്ന്ന നിരക്കില് ടിക്കറ്റ് ബുക്ക് ചെയ്തവര്ക്ക് അര്ഹതപ്പെട്ട തുക തിരികെ ലഭിക്കും. എയര് ഇന്ത്യയാണ് ഇക്കാര്യം വ്യക്തമാക്കിയത്. ശനിയാഴ്ച രാവിലെയാണ് സര്ക്കാര് ഉത്തരവിറങ്ങിയതെങ്കിലും വെബ്സൈറ്റിലും തേര്ഡ് പാര്ട്ടി പോര്ട്ടലുകളിലും ഘട്ടം ഘട്ടമായാണ് ഇതനുസരിച്ചുള്ള നിരക്കിലെ മാറ്റങ്ങള് വരുത്തുന്നത്. നിരക്ക് നിയന്ത്രണം ഏര്പ്പെടുത്തിയിട്ടും വിമാനക്കൂലി കുറഞ്ഞില്ലെന്ന് പലരും വിമര്ശനമുന്നയിച്ചിരുന്നു.
എയര് ഇന്ത്യ എക്പ്രസ് പുതിയ നിയന്ത്രണം പൂര്ണമായും നടപ്പാക്കിയതായി എയര് ഇന്ത്യ ഗ്രൂപ്പ് തിങ്കളാഴ്ച പുലര്ച്ചെ അറിയിച്ചു. എയര് ഇന്ത്യ ഇതനുസരിച്ചുള്ള മാറ്റങ്ങള് വരുത്തിക്കൊണ്ടിരിക്കുകയാണ്. ചില തേര്ഡ് പാര്ട്ടി സിസ്റ്റങ്ങളെ ആശ്രയിക്കുന്നതുകൊണ്ടാണ് കാലതാമസമുണ്ടായതെന്ന് കമ്പനി അറിയിച്ചു. ശനിയാഴ്ച മുതല് നിരക്ക് നിയന്ത്രണം നടപ്പാക്കുന്നതുവരെ ഉയര്ന്ന അടിസ്ഥാനനിരക്കില് ടിക്കറ്റ് ബുക്ക് ചെയ്യുന്നവര്ക്ക് ഇവ തമ്മിലുള്ള വ്യത്യാസം എത്രയാണോ, ആ തുക യാത്രക്കാന് തിരികെ ലഭിക്കുമെന്ന് കമ്പനി അറിയിച്ചു.
2020ല് കോവിഡ് കാലത്തിനു ശേഷം ആദ്യമായാണ് കേന്ദ്രം വിമാനടിക്കറ്റിന് പരിധി നിശ്ചയിക്കുന്നത്. ഫ്ലൈറ്റ് ദൂരമനുസരിച്ചാണ് നോണ്സ്റ്റോപ്പ് ഇക്കോണമി ക്ലാസിലെ നിരക്ക് നിശ്ചയിച്ചിരിക്കുന്നത്. നിരക്കുകള് പൂര്വസ്ഥിതിയിലെത്തും വരെ നിയന്ത്രണം തുടരും. ആഭ്യന്തര സര്വീസിന് പരമാവധി 18,000 രൂപയില് കൂടുതല് അടിസ്ഥാനനിരക്കായി ഈടാക്കാന് പാടില്ല. 500 കിലോമീറ്റര് ദൂരമുള്ള യാത്രയ്ക്ക് 7,500 രൂപയാണ് പരിധി. ഇതിനു പുറമേയാണ് യൂസര് ഡവലപ്മെന്റ് ഫീസ്, പാസഞ്ചര് സര്വീസ് ഫീസ്, നികുതി എന്നിവ. ഇന്ഡിഗോ പ്രതിസന്ധിക്കു പിന്നാലെ കമ്പനികള് നിരക്ക് കുത്തനെ വര്ധിപ്പിച്ചതോടെയാണ് സര്ക്കാര് നിയന്ത്രണാധികാരങ്ങള് പ്രയോഗിച്ചത്. ബിസിനസ് ക്ലാസിനും ഉഡാന് ഫ്ലൈറ്റുകള്ക്കും ഈ നിരക്കുകള് ബാധകമല്ല.
വിമാന ടിക്കറ്റിന് ഉയര്ന്ന നിരക്ക്: കേന്ദ്ര ഉത്തരവിനുശേഷം ബുക്ക് ചെയ്തവര്ക്ക് അധിക തുക തിരികെ ലഭിക്കും
