പത്തനംതിട്ട: ഇഷ്ടപ്പെട്ട യുവതിയുടെ വീട്ടുകാരുടെ മതിപ്പു നേടാന് സൃഷ്ടിച്ച വാഹനാപകടത്തില് രക്ഷകനായെത്തിയ യുവാവും അപകടമുണ്ടാക്കിയ സുഹൃത്തും അറസ്റ്റില്. ഇടിച്ചിട്ടുനിര്ത്താതെ പോയ കാര് പൊലീസ് അന്വേഷണത്തില് കണ്ടെത്തിയതോടെയാണ് നാടകം പൊളിഞ്ഞത്. വാഹനാപകടക്കേസ് നരഹത്യാശ്രമത്തിനുള്ള കേസാകുകയും ചെയ്തു. ഒന്നാം പ്രതി കോന്നി മാമ്മൂട് സ്വദേശി രഞ്ജിത് രാജന് (24), രണ്ടാം പ്രതി കോന്നി പയ്യനാമണ് സ്വദേശി അജാസ് (19) എന്നിവരാണ് അറസ്റ്റിലായത്.
ഡിസംബര് 23നു വൈകിട്ട് സ്കൂട്ടറില് പോകുകയായിരുന്ന യുവതിയെ പത്തനംതിട്ടയ്ക്കടുത്ത് വാഴമുട്ടം ഈസ്റ്റില്വച്ച് അജാസ് കാറില് പിന്തുടര്ന്ന് ഇടിച്ചുവീഴ്ത്തിയശേഷം നിര്ത്താതെ പോയി. ഉടന് മറ്റൊരു കാറില് സ്ഥലത്തെത്തിയ രഞ്ജിത് രക്ഷാപ്രവര്ത്തനം ഏറ്റെടുത്ത് യുവതിയെ ആശുപത്രിയിലെത്തിച്ചു. താന് യുവതിയുടെ ഭര്ത്താവാണെന്നു നാട്ടുകാരെ തെറ്റിദ്ധരിപ്പിക്കുകയും ചെയ്തു.
കൃത്യസമയത്ത് രഞ്ജിത് സ്ഥലത്തെത്തിയതില് പൊലീസിനു സംശയം തോന്നിയിരുന്നു. കാര് ഓടിച്ചയാളുടെ ഫോണ് വിവരങ്ങള് പരിശോധിച്ചപ്പോള് കൂടുതല് വിവരങ്ങള് ലഭിക്കുകയും ചെയ്തു. അപകടത്തില് യുവതിയുടെ വലതു കൈക്കുഴ തെറ്റുകയും ചെറുവിരലിനു പൊട്ടലുണ്ടാകുകയും ചെയ്തു. പത്തനംതിട്ട പൊലീസ് സ്റ്റേഷനിലെ എസ്ഐ ഷിജു പി.സാമാണ് അന്വേഷണം നടത്തുന്നത്. പ്രതികളെ കോടതിയില് ഹാജരാക്കി റിമാന്ഡ് ചെയ്തു.
യുവതിയുടെ വീട്ടുകാരുടെ മതിപ്പു നേടാന് വാഹനാപകട നാടകം; യുവാവും സുഹൃത്തും നരഹത്യാശ്രമത്തിന് അറസ്റ്റില്
